श्रीगणेशस्तोत्र

        श्रीगणेशस्तोत्र 

       श्रीगणेशाय नमः  नारद उवाच

        प्रणम्य शिरसा देवं गौरीपुत्रं विनायकम् |
        भक्तावासं स्मरेनित्यं आयुःकामार्थसिद्धये || १ ||

        प्रथमं वक्रतुण्डं च एकदन्तं द्वितीयकम् |
        तृतीयं कृष्णपिङ्गाक्षं गजवक्त्रं चतुर्थकम् || २ ||

        लम्बोदरं पञ्चमं च षष्ठं विकटमेव च |
        सप्तमं विघ्नराजेन्द्रं धूम्रवर्णं तथाष्टमम् || ३ ||

        नवमं भालचन्द्रं च दशमं तु विनायकम् |
        एकादशं गणपतिं द्वादशं तु गजाननम् || ४ ||

        द्वादशैतानि नामानि त्रिसंध्यं यः पठेन्नरः |
        न च विघ्नभयं तस्य सर्वसिद्धिकरः प्रभुः || ५ ||

        विद्यार्थी लभते विद्यां धनार्थी लभते धनम् |
        पुत्रार्थी लभते पुत्रान्मोक्षार्थी लभते गतिम् || ६ ||

        जपेद्गणपतिस्तोत्रं षड्भिर्मासैः फलं लभेत् |
        संवत्सरेण सिद्धिं च लभते नात्र संशयः || ७ ||

        अष्टेभ्यो ब्राह्मणेभ्यश्च लिखित्वा यः समर्पयेत् |
        तस्य विद्या भवेत्सर्वा गणेशस्य प्रसादतः || ८ ||

        इति श्रीनारदपुराणे संकटनाशनं गणेशस्तोत्रं संपूर्णम् |